भ्रमणको लागि पोखरा आएको मिनीबस दुर्घटना, २ जना घाईते
पोखरा ।
पोखरामा सवारी दुर्घटना हुँदा दुईजना घाइते भएका छन् । बिहीबार मध्यान्ह सवा १२ बजेको समयमा पोखरा २२ शान्तिस्तूप नजिकै बस दुर्घटना भएको हो । नव युग डान्स क्लब दाङबाट भ्रमणको लागि आएको रा १ ख २१०६ नं. को मिनी बस पुम्दीकोटबाट छोरेपाटनतर्फ आउँदै गर्दा दुर्घटनामा परेको जिल्ला प्रहरी कार्यालय कास्कीले जानकारी दिएको छ । बस सडक छेउमा रहेको रुखमा अडकिएको थियो ।
बसमा सवार महिला ७ जना र पुरुष १७ जना गरी जम्मा २४ जना मध्ये २ जना घाईते भई उपचारको लागि नमस्ते अस्पताल बिरौटा पठाइएको प्रहरीले जनाएको छ । घाईते हुनेमा दाङको तुल्सीपुर उपमहानगरपालिका ४ बस्ने वर्ष १७ की सन्ध्या रसाइली र वर्ष १९ की मनिषा रसाइली रहेका छन् । उनीहरूको अवस्था समान्य रहेको प्रहरीको भनाइ छ । दुर्घटनाबारे थप अनुसन्धान भैरहेको जनाइएको छ ।
