• तातोपानीमा पौडी खेल्दैमा एकता हुँदैन ः काँग्रेस वरिष्ठ नेता पौडेल

    March 10, 2019     7:59 pm


    हतियार र बम आतंकको जिम्मा प्रचण्डले लिनुपर्छ

    पोखरा, २६ फागुन

    नेपाली काँग्रेसका वरिष्ठ नेता रामचन्द्र पौडेलले तातोपानीमा नुहाउँदैमा एकता नहुने बताएका छन् ।

    नेपाल प्रेस युनियन कास्कीको नवौं जिल्ला अधिवेशनबाट निर्वाचित नयाँ कार्यसमितिलाई बधाई तथा शुभकामना कार्यक्रममा सम्बोधन गर्दै उनले भावनात्मक रुपमा भने एकता नभएको स्पष्ट पारे ।

    ‘एकता त्यत्तिकै हुँदैन । हामी एक भयौं भन्दैमा एकता हुने होइन । तातोपानीमा पौडी खेलेर एकता हुन्छ ?, उनले भने, ‘तातोपानीमा सँगसँगै डुब्यो भन्दैमा एकता भयो भनेर प्रचार गर्नुपर्दैन ।’

    पार्टी सभापति शेरबहादुर देउवा सहित गण्डकी प्रदेशका विभिन्न जिल्लामा निस्किएका पौडेलले म्याग्दीको तातोपानीमा पौडी खेलेकोबारे प्रसंग जोड्दै भने, ‘भावना र एजेण्डामा एकता भएमात्र एकताको सार्थकता हुन्छ र पार्टीले गति लिन्छ ।’

    पौडेलले भने, ‘केन्द्रीय समितिको पछाडि पछाडि आफू हिड्ने कि आफ्नो पछाडि हिड्ने सोबारे एजेण्डा लिएर जनतामाझ जानुपर्छ ।’

    पार्टी सुधारका लागि आफूले तिथि मितिसहित महाधिवेशनको कार्यतालिका दिएको भन्दै वरिष्ठ नेता पौडेललले कार्यतालिका अनुसार महाधिवेशनको तयारी गर्न आग्रह गरे । पौडेलले सिके राउतसँग सरकारले गरेको सम्झौता पारदर्शी हुनुपर्ने बताएका छन् ।

    देशमा हत्या, हिंसा र बलात्कारका घटना दिनहूँ बढिरहेको भन्दै उनले सरकार सबै हिसाबले फेल भैसकेको टिप्पणी गरे ।

    ‘दिनहुँ बलात्कारका घटना छन् । दिउँसै बन्दुक पड्किन थालिसक्यो । निर्दोष नागरिक मारिन थाले,’ उनी भन्छन्, ‘न्यायालय र अख्तियारमा सरकार हावी छ । सही न्याय जनताले पाएनन् ।’

    प्रजातन्त्र र राष्ट्रियता मास्ने काम भ्रष्टाचारले गर्ने भन्दै प्रधानमन्त्री ओलीले बोलीमा सुशासनका कुरा गर्ने तर व्यवहारमा भ्रष्टाचारीलाई संरक्षण गर्ने गरेको आरोप लगाए ।

    उनले सरकारले सुशासन र शान्तिको प्रत्याभूति दिन नसकेको बताए । विप्लव माओवादीको बल आतंकको जिम्मा प्रचण्डले लिनुपर्ने पौडेलले बताए । विगतको शान्ति सम्झौतामा क्यान्टोन्मेन्टका हतियार राज्यको मातहतमा रहे पनि व्यक्तिसँग रहेका हतियार राज्यलाई बुझाउन नसक्नुको परिणाम हो भने । जनतालाई बम आतंकको घेरामा राख्नु हुँदैन, विगतमा प्रचण्डले लुकाएका हतियार नै अहिले देखा परेको दाबी गरे ।

    नेपाली काँग्रेस कास्कीले आयोजना गरेको सो कार्यक्रममा काँग्रेस केन्द्रीय सदस्य डा. शेखर कोइरालाले सिके राउतलाई राजनीतिको मूलधारमा ल्याउनु राम्रो भए पनि उनीसँग भएका सहमतिका बुँदा आपत्तिजनक भएको बताए ।

    उनले मधेशमा जनमत संग्रह गराउने जस्ता विषयमा प्रधानमन्त्री लाग्नु देशकै लाचारीपन भएको टिप्पणी गरे । सरकार संघीयता सफल पार्न उद्दत रहेको आरोप समेत लगाए ।

    काँग्रेसका केन्द्रीय सदस्य गुरु घिमिरेले ओलीले राउतसँग सम्झौता गरेर देश विभाजनको बीउ रोपेको आरोप लगाए ।

    नेपाली काँग्रेस कास्कीका सभापति कृष्ण केसीको अध्यक्षतामा भएको कार्यक्रममा काँग्रेसका पूर्व आमन्त्रित सदस्य शुक्रराज शर्मा, प्रेस युनियन कास्की अध्यक्ष नवीन सिग्देल, युनियनका निवर्तमान अध्यक्ष शिरोमणि बराल, काँग्रेस नेतृ सरस्वती गुरुङ, पार्टीका जिल्ला उपसभापति आइबहादुर गुरुङ, सचिव देवेन्द्र रानाभाट लगायतले जनताको पक्षमा कलम चलाउन पत्रकारहरुलाई आग्रह गरे ।

    गत फागुन ११ गते भएको युनियनको नवौं अधिवेशनबाट सिग्देलको अध्यक्षतामा २१ सदस्यीय नयाँ कार्यसमिति निर्वाचित भएको थियो ।

    Pokhareli News

    Address 

    Pokhara – 8, Newroad, Damakal Marga

    Phone

    061-521497, 9805810051

    Email 

    pokharelinews@gmail.com

    Our Team

    Managing Director

    Khem Bahadur Gurung ‘Uttam’

    Chief Management Officer 

    Ekraj Giri

    Editor 

    Sanjaya Kumar Malla 9805810051

    More..

    About Us

    पोखरेली न्युज पोखराबाट प्रकाशित हुने साप्ताहिक पत्रिका हो । गण्डकी प्रदेशको राजधानी पोखराबाट स्थानिय, राष्ट्रिय तथा अन्तराष्ट्रिय समाचारलाई प्रमुखताका साथ स्थान दिइ पाठकको चाहना मुताविक अगाडी बढिरहेको छ । सत्य, तथ्य समाचारलाई पाठकमाझ ल्याइ समाज र देशलाई सकारात्मक बाटो तर्फ लम्काउनु नै हाम्रो मुल उद्देश्य हो ।